Behin baino gehiagotan, okerreko esamoldeak erabiltzen ditugu umeekin. Hona argibide batzuk, hutsak zuzentzeko.
Ekarri berba guztiak euskarazko moldera, gaztelaniazko pluralak edo txikigarriak sartu barik
TXARTO: Nahi duzu gailetita?
ZUZEN: Gailetatxua nahi duzu?
TXARTO: Joango gara gusanitos erosten?.
ZUZEN: Joango gara gusanitoak erosten?
TXARTO: Lolos egin behar du umeak.
ZUZEN: Lolo egin behar du umeak.
TXARTO: Nor da amatxuren printzesita?
ZUZEN: Nor da amatxuren babalorea?
Gogoan hartu euskarazko esateko moduak, gaztelaniatik hitzez hitz itzultzen ibili barik
TXARTO: Bazkalostean siesta botako dugu.
ZUZEN: Bazkalostean siestatxua / lo-kukua egingo dugu.
TXARTO: Gose daukazu?
ZUZEN: Gose zara?
TXARTO: Txizalarri / kakalarri daukazu?
ZUZEN: Txizalarri / kakalarri zara?
TXARTO: Gura duzu txiza / kaka?
ZUZEN: Gura duzu txiza / kaka egin?
TXARTO: Noren zorionak dira gaur?
ZUZEN: Noren eguna / urtebetetzea / urteguna da gaur?
Ez nahastu aditzaren aginterako eta orainaldiko formak
TXARTO: Goaz apapan.
ZUZEN: Goazen apapan. [agintera]
TXARTO: Goaz apapan?
ZUZEN: Bagoaz apapan? Joango gara apapan?
TXARTO: Zatoz nirekin eskolara?
ZUZEN: Bazatoz nirekin eskolara? Joango gara elkarrekin eskolara?
Kontuan hartu gaztelaniaz erreflexibo modura jokatzen diren aditz askok bestelako jokoa dutela euskaraz
TXARTO: Pupu / min egin zara?
ZUZEN: Pupu / min egin duzu?
TXARTO: Garbitu zara eskuak?
ZUZEN: Garbitu dituzu eskuak?
TXARTO: Ai, ai, ai, txiza egin zara praketan.
ZUZEN: Ai, ai, ai, txiza egin duzu praketan.
TXARTO: Ama, jantzi naz soinekoa.
ZUZEN: Ama, soinekoa jantzi dut.
TXARTO: Ahaztu naiz jaka plazan.
ZUZEN: Jaka ahaztu egin zait plazan.
Gogoan hartu zenbat pertsona edo gauza dugun jokoan esaldian (nor, nork, nor-nork, zer-nori-nork...)
TXARTO: Gaur Aiorari ikusi diot eskolan.
ZUZEN: Gaur Aiora ikusi dut eskolan.
TXARTO: Ama, Mikelek jo egin dit!
ZUZEN: Ama, Mikelek jo egin nau!
TXARTO: Lander esan du gezurra!
ZUZEN: Landerrek gezurra esan du!
TXARTO: Ekarriko duzu ogia amatxuri?
ZUZEN: Ekarriko diozu ogia amatxuri?
Eskariak egiteko, etorkizuneko forma darabilgu euskaraz, ez orainaldikoa
TXARTO: Ematen didazu patxu bat?
ZUZEN: Emango didazu patxu bat?
TXARTO: Etortzen zara gurekin jolasten?
ZUZEN: Etorriko zara gurekin jolasten?
TXARTO: Joaten gara plazara jolasten?
ZUZEN: Joango gara plazara jolasten?
TXARTO: Uzten didazu pilota apur bat?
ZUZEN: Utziko didazu pilota apur baten?
Gogoratu aditz forma trinkoek ba- euskarria behar dutela esaldi hasieran agertzeko edo indartuta agertzeko
TXARTO: Dakizu gauzatxu bat?
ZUZEN: Badakizu gauzatxu bat? Ezetz jakin gauzatxu bat?
TXARTO: Dakizu ke hagina jausi zaidala?
ZUZEN: Badakizu? Gaur hagina jausi zait!
TXARTO: Nik ere daukat alabatxu bat.
ZUZEN: Nik ere badaukat alabatxu bat.
TXARTO: Nik ya dakit hori.
ZUZEN: Nik badakit hori.
Kontuz gaztelaniazko querekin: ez da beti -la. Joera handia dago bere horretan uzteko ere
TXARTO: Kontuz, kotxea datorrela.
ZUZEN: Kontuz, kotxea dator eta.
TXARTO: Kontuz, jausi egingo zarela.
ZUZEN: Kontuz, gero, jausi barik.
TXARTO: A ke gozo dago izozkia?
ZUZEN: Gozoa da izozkia, ezta?
TXARTO: A ke irabazi egingo dugu?
ZUZEN: Geuk irabaziko dugu!
TXARTO: Ke esan dizut platerekoa amaitzeko!
ZUZEN: Esan dizut, ba, platerekoa amaitzeko!
Gaztelaniazko forma batzuk adierazteko, euskaraz beste aditz eta molde batzuk erabiltzen ditugu
TXARTO: Nik badakit trikitixa ukitzen.
ZUZEN: Nik badakit trikitixa jotzen.
TXARTO: Atea ukitu dute. Nor ote da?
ZUZEN: Atea jo dute. Nor ote da?
TXARTO: Oporretan joateko gogo batzuk dauzkat!
ZUZEN: Oporretan joateko gogo itzela dut.
TXARTO: Gaur bero asko dago!
ZUZEN: Gaur bero handia dago.
TXARTO: Nire aitak lanean daude.
ZUZEN: Nire gurasoak lanean daude.
TXARTO: Nire aititak Atxurin bizi dira.
ZUZEN: Nire aitita-amamak Atxurin bizi dira.
TXARTO: Zelako morroa! Berak jan ditu patata guztiak.
ZUZEN: Horrek dauka aurpegia! Berak jan ditu patata guztiak.
